ఆంధ్రా పేపర్ మిల్లుకు తాళం.. విధులకు రావొద్దంటూ ఉద్యోగులకు సందేశాలు

తూర్పుగోదావరి జిల్లాలో మరో భారీ పరిశ్రమ సంక్షోభంలో చిక్కుకుంది. కడియంలో దశాబ్దాలుగా నడుస్తున్న ప్రతిష్ఠాత్మక ఆంధ్రా పేపర్ మిల్లును యాజమాన్యం లాకౌట్ చేస్తున్నట్లు ప్రకటించింది. మిల్లులో పనిచేసే పర్మినెంట్ ఉద్యోగులు ఎవరూ విధులకు హాజరు కావొద్దని శనివారం సందేశాలు పంపింది. దీంతో పాటు మిల్లు గేటు వద్ద లాకౌట్ నోటీసును అంటించింది. ఈ అనూహ్య పరిణామంతో కార్మికులు, వారి కుటుంబసభ్యులు తీవ్ర ఆందోళనకు గురవుతున్నారు.

ఏం జరిగింది?
గత మూడేళ్లుగా కొత్త వేతన ఒప్పందాలు (అగ్రిమెంట్లు) అమలు చేయకుండా యాజమాన్యం తమను మోసం చేస్తోందని ఆరోపిస్తూ గత ఐదు రోజులుగా కాంట్రాక్ట్ కార్మికులు సమ్మె చేస్తున్నారు. తమ సమస్యలను పరిష్కరించాలని డిమాండ్ చేస్తున్నారు. కార్మికుల ఆందోళన తీవ్రమవుతున్న నేపథ్యంలో యాజమాన్యం చర్చలకు బదులుగా ఏకంగా లాకౌట్ ప్రకటించడం వివాదాస్పదంగా మారింది. దీంతో పర్మినెంట్ ఉద్యోగుల భవిష్యత్తు కూడా ప్రశ్నార్థకంలో పడింది.

రంగంలోకి దిగిన ఎమ్మెల్యే, అధికారులు
కార్మికుల సమ్మెకు రాజమహేంద్రవరం రూరల్ ఎమ్మెల్యే గోరంట్ల బుచ్చయ్య చౌదరి తన మద్దతు ప్రకటించారు. లాకౌట్ నిర్ణయంపై ఆయన తీవ్ర ఆగ్రహం వ్యక్తం చేశారు. శనివారం యాజమాన్యంతో తాను స్వయంగా చర్చలు జరిపి, సమస్యను పరిష్కరిస్తానని కార్మికులకు హామీ ఇచ్చారు. మరోవైపు కార్మిక శాఖ అధికారులు కూడా నేడు మిల్లును సందర్శించి పరిస్థితిని సమీక్షించనున్నట్లు సమాచారం. కార్మిక దినోత్సవం సమీపిస్తున్న వేళ కార్మికులను అణచివేసేందుకే యాజమాన్యం లాకౌట్ ప్రకటించిందని సీఐటీయూ నేతలు విమర్శించారు.

జిల్లాలో వరుసగా మూతపడుతున్న పరిశ్రమలు
1964లో స్థాపించిన ఈ మిల్లులో రైటింగ్, ప్రింటింగ్ పేపర్లు తయారవుతాయి. ఇటీవలే రూ. 3,400 కోట్ల పెట్టుబడితో దీనిని ఆధునికీకరించాలని నిర్ణయించారు. ఇంతలోనే లాకౌట్ ప్రకటించడం గమనార్హం. ఇటీవల కాకినాడలోని ప్యారీ షుగర్స్ ఫ్యాక్టరీ కూడా భారీ నష్టాల కారణంగా మూతపడిన సంగతి తెలిసిందే. ఇప్పుడు ఆంధ్రా పేపర్ మిల్లులో లాకౌట్ ప్రకటించడంతో ఉమ్మడి తూర్పుగోదావరి జిల్లా పారిశ్రామిక రంగంపై ఆందోళనలు వ్యక్తమవుతున్నాయి.